Unang anibersaryo sa pagkagawasnon sa Tangub, malampuson nga gipahigayon (Liberation and Thanksgiving Celebration)

Makasaysayan ang nahitabong kadaugan sa Asenso Team sa miaging piniliay 2022.  Sulod sa halos lima ka dekada nga ang renda sa pamunuan sa siyudad sa Tangub gikuptan lamang sa usa ka apelyido, dili tiaw ang nahimong kadaugan sa eleksyon. 

Dala sa nagdilaab nga tinguha nga dunay kabag-ohan nga mahitabo, nanglimbasog ang Team Asenso aron maangkon ang kadaugan.  Uban sa suporta sa nagkalain-laing sector, nagmalampuson ang ilang mga tinguha.

Ang Asenso Liberation and Thanksgiving Celebration usa ka makahuluganon nga kasaulogan.  Kini nagbalik-lantaw sa mga kaagi ug pagpanglimbasog aron maangkon ang kadaugan, ug pagpadayag sa katumanan sa mga saad kaniadtong eleksyon.   Kini usa pud ka pagpasalamat sa mga nagduyog sa kawsa sa Team Asenso.

Gipahigayon ang selebrasyon sulod sa siyam ka adlaw. Kini gisugdan niadtong Mayo 2 hangtud Mayo 10. Ang kada adlaw nga kasaulugan, ginasugdan pinaagi sa usa ka Misa. Sa ika-siyam o katapusang adlaw (Mayo 10, 2023), adunay nagkalain-laing kalihokan nga gipahigayon isip paghatag ug bili sa anibersaryo sa pagkagawasnon sa Tangub.

Una nga gipahigayon ang Zumba and Color Fun Run sa may alas kwatro sa buntag (4:00 am). Sunod nga gipahigayon ang Basketball Game Championship sa may ala una sa hapon (1:00 pm). Sa samang oras usab, gipahigayon ang Press Conference sa mga City Officials diin anaa ang nagkalain-laing Media Partners aron sa pagsukit sa mga opisyales kung unsa na ang estado sa dakbayan sa Tangub ug unsa ang mga kausaban nga nabati sa katawhan sa dakbayan.

Matud pa ni Mayor Ben Canama, “Ang pangandoy nato dinhi sa dakbayan sa Tangub magpuyo ta subay sa atoang panlantaw nga una ang Ginoo ug dad-on nato ang 5Ms sa probinsya dayon makab-ot unta nato dinhi sa dakbayan sa Tangub ang tinuod gyud nga pagminahalay.  Kini ang panahon nga ang dakbayan sa Tangub molambo. “

Human sa Press Conference, gisugdan ang pagpahigayon sa Victory Caravan.  Liboan nga mga katawhan ang mikuyog ug nakigduyog sa pagpakita og suporta sa Team Asenso.  Bisan paman nga wala kini libre nga kaon, gasolina, og sakyanan, bolontaryo  gayud sila nga miuban.  

Human sa Victory Caravan, gisunod   ang usa ka santos nga Misa pinangunahan sa daghan nga mga kaparian. Gipahigayon usab ang pag padayag sa bag-o nga Official Seal sa Tangub City.

Dili matukib ang kalipay nga nasinati ni Mayor Ben Canama ug mga opisyales sa Tangub. Sa iyahang mensahe, iyang gibutyag ang mga naagian nga pagpakig-bisog sa matag usa aron makab-ot ang kadaugan. Siya kinasing-kasing nga mapasalamaton sa mga nihalad sa kaugalingon og nihalad sa kinabuhi kaniadtung nilabay nga eleksyon.

Dugang niya, kung wala ang pag sakripisyo sa mga supporters og mga nibarog sa kawsa, dili kini nila makab-ot ang kadaugan. Utang kini nila sa Ginoo og sa mga katawhan nga nagmahal sa Anak Tangub-Team Asenso.

Human sa programa, nakigduyog ang katawhan sa duha ka banda nga mao ang Jam Trip Band og Limitless Magnus nga gikan pa gayud sa Dumaguete City. Anaa usab sila DJ Skulnick og DJ Kaori Ramos aron sa pagtugtog sa gipahigayon nga disco party.

Gitapos ang kalihukan sa usa ka masigarbong fireworks display.