Laag-laag sa Barangay

---

Tungod sa tinguha ni Mayor Ben Canama nga dili mahimong langyaw sa kaugalingong lungsod ang mga Tangubanon, iyang gilusad ang programang Laag-laag sa Tangub. Iyang tumong nga 20% ka botante sa kada barangay ang ipaapil sa maong biyahe. Kini isa sa mga priority programs nga gipatuman sa kagamhanan sa Syudad. Gilauman nga sa pagkahuman unya sa Panguil Bay Bridge, modagsa ang mga turista sa Tangub City nga makadugang sa paglambo sa ekonomiya sa siyudad. 

Aron ma promote ang Tangub isip tourist destination, kinahanglan ang mga Tangubanon mismo ang unang mahigugma sa siyudad. Sa mga paghinabi sa katawhan, nasayran sa Mayor nga daghan pa kaayo ang wala pa sukad nakaadto sa mga nailhang landmarks dire sa siyudad. Ang biyahe mo gikan alas dos sa hapon ug mahuman alas dyes sa gabii.

Mao kini ang mga landmarks nga pagabisitahon sa mga local tourists. Una, ang Belvedere, ikaduha ang Stone Chapel nga pareho nahimutang sa Barangay Hoyohoy. Ika duha nga adtuan ang Tangub Eco Dam Park nga naa sa Barangay Manga. Kini usa ka Small River Impoundig Project (SRIP) nga gitukod sa National Irrigation Administration Region X para flood control ug irrigation system. Ikaupat nga adtuon ang Parola, kanhi nailhan nga Gov. Alfonso Tan Aquamarine Park (GATAP) nga nahimutang sa Barangay Lorenzo Tan. Ang ikalimang bisitahon mao ang Panguil Bay Bridge, sa kasamtangan gina tukod pa. Nahimutang sa Barangay Silanga, kining 3.7 kilometro nga tulay mokutay sa lalawigan sa Misamis Occidental pinaagi sa Tangub City ug lalawigan sa Lanao del Norte pinaagi sa lungsod sa Tubod. Ang kanhi duha ka oras ug tunga nga biyahe tabok sa Panguil Bay sakay sa barge, mahimo na lamang 7 ka minuto pinaagi sa Panguil Bay Bridge.

Ang ika unom nga destinasyon mao ang Maloro Beach, ang nag-inusarang beach sa Tangub. Gipalapadan ang shoreline sa beach aron mas hamugaway ug daghan ang maka enjoy sa hoyohoy sa hangin gikan sa dagat. Ang biyahe mo human sa Sinanduloy Cultural Center gym aron magatapok ang tanang nang laag-laag sa usa ka panihapon nga gihatag sa City Government. Human panihapon, ang mga turista lingawon pinaagi sa usa ka banda nga nagtokar para sa tanan. Sakay sa mga public utility vans ang mga turista, ang unang adlaw sa laag-laag nahitabo niadtong Nobyembre 28, 2022 nga giubanan sa 235 ka lumulupyo sa Barangay Sta. Maria.