Kasadya sa Barangay

Atol sa programa sa Asenso Administration sa pagdala ug kasadya o kalingawan sa mga barangay, gilusad ang programang Kasadya sa Barangay nga gisugdan atong bulan sa Nobyembre, 2022. Tumong niini ang pagdala ug kasadya kun lingaw lingaw, kanta-kanta og sayaw-sayaw sa matag barangay sa Tangub. Ang programa gihimo sa mga opisyales ning dakbayan pinanguluhan ni Mayor Ben Canama aron ang mga katawhan sa lagyong dapit nga dili dayon maka anhi sa kalihokan sa sentrong bahin sa syudad makasinati pod sa kalingaw og kasadya. Gi grupo ug tag tulo (3) ang singkwenta y singko (55) ka mga barangay sa Tangub. Ang matag grupo magpili ug usa ka barangay nga maoy mo-host sa maong kalihokan. Lakip sa kalihokan ang kahigayonan sa mga edaran diin sila magsayaw og mga kinaraan nga sayaw sama sa chacha, rumba, tanggo og uban pa. Sa ikaduhang parte sa maong kasadya, anaa usab higayon nga makasayaw ang mga kabatan-onan. Ang maong kalihokan gisalmotan ni Mayor Ben Canama, mga opisyales sa syudad pinanguluhan ni Vice Mayor Tito Decina, ug ubang empleyado sa lokal nga pangagamhanan sa Tangub. Ang ika-dise otso (18) o kinatapusan nga mga barangay nga nagpahigayon sa maong kalihokan ang Barangay Kimat, Baluc og Sto Niño. Gipahigayon kini Sa Barangay Kimat covered court niadtong Enero 25, ning 2023. Bisan paman dugay nabalik ang pagsiga sa kurente sa maong dapit, nagsadya gihapon ang mga katawhan sa maong barangay ug matag usa kanila nalingaw sa mga pagkaon nga giandam sa mga opisyales sa barangay. Sa kinatibuk-an, mapasalamaton ang kinabag-ang katawhan sa Tangub sa maong programa nga gilusad sa bagong administrasyon. Matud pa ni Mayor Ben Canama, lauman sa mga Tangubanons nga aduna pay daghang programa ang mamugna para makahatag ug lipay sa mga katawhan ilabina kadtong wa nay igong panahon makalaag sa sentrong bahin ning dakbayan.